(32.1) interea Psyche cum sua sibi perspicua pulchritudine nullum decoris sui fructum percipit. spectatur ab omnibus, laudatur ab omnibus, nec quisquam, non rex non regius nec de plebe saltem cupiens eius nuptiarum petitor accedit. (2.) mirantur quidem diuinam speciem, sed ut simulacrum fabre politum mirantur omnes. (3.) olim duae maiores sorores, quarum temperatam formonsitatem nulli diffamarant populi, procis regibus desponsae iam beatas nuptias adeptae, (4.) sed Psyche uirgo uidua domi residens deflet desertam suam solitudinem aegra corporis animi saucia, et quamuis gentibus totis complacitam odit in se suam formonsitatem. (5.) sic infortunatissimae filiae miserrimus pater suspectatis caelestibus odiis et irae superum metuens dei Milesii uetustissimum percontatur oraculum, (6.) et <a> tanto numine precibus et uictimis ingratae uirgini petit nuptias et maritum. sed Apollo, quanquam Graecus et Ionicus, propter Milesiae conditorem sic Latina sorte respondit.

aegra corporis animi saucia : cf. Ennius scen. 254 Vahlen² = 216 Jocelyn Medea animo aegro amore saeuo saucia ; Virgile Aen. 4,1 at regina graui iamdudum saucia cura | uulnus alit uenis et caeco carpitur 

propter Milesiae conditorem : cf. met. 1,1 at ego tibi sermone isto Milesio uarias fabulas conseram […] fabulam Graecanicam incipimus.

Apollo, quanquam Graecus et Ionicus, […] Latina sorte respondit : cf. Cicéron diu. 2,116 quis enim est, qui credat Apollinis ex oraculo Pyrrho esse responsum: « aio te, Aeacida, Romanos uincere posse? » [Ennius ann. 167 Skutsch] primum Latine Apollo numquam locutus est; deinde ista sors inaudita Graecis est; praeterea Pyrrhi temporibus iam Apollo uersus facere desierat.